مبدئياّ كدة الموضوع ده مبيحصلش غير في العربيات الكاربراتير ومعني إن العربية تشرق يعني البنزين نسبته زادت جداّ في الكاربراتير وفيه ناس بتقول ساعتها إن الكاربراتير غرق بنزين نتيجة إنك بتدوس بنزين كتير والعربية مش شغالة زي بظبط كأن حد بيشربك مياه وأنت نايم !! وبالتالى الموتور بيشرق وبتفضل أكتر من مرة بتحاول مرة وبتشم ريحة بنزين جامدة .. وطبعاّ في الحالة دي يستحيل العربية هتشتغل معاك لأن البنزين كاتمها طيب عشان بقي ندور العربية في الحالة دي وهى شرقانة هنعمل إيه ؟!
هنلف المفتاح في الكونتاكت والرجل اليمين علي البنزين ونلف المفتاح والرجل تدوس على دواسة النزين لغاية أخر مشوارها وتدور العربية بس وأنت دايس على الدواسة لغاية ما تلاقي العربية دارت تبدأ ترفع رجلك من على الدواسة واحدة واحدة عشان متفصلش كدة أنت كأنك بتسحب البنزين من الكاربراتير واحدة واحدة