سريعاّ كدة .. ببساطة كدة أعراض تلف بلي العجل بتكون كأن فيه حاجة ماسكة في العجل "كأن الفرامل قافشة على خفيف أوي" + إنك هتلاقي صوت زي صوت الهوا بيظهر مع المشي وبيزيد مع زيادة سرعة العربية أما في المراحل المتقدمة هتسمع صوت صفارة شبه صوت صفارة المكنسة وهي شغالة والصوت بيزيد مع زيادة سرعة العربية برضو ..
والكشف بيبقي عن طريق إنك بترفع العربية بكوريك وتلف كل عجلة لوحدها وتقارنها بالعجلة التانية من حيث سهولة الحركة وهل فيه صوت نحر ولا لأ !! ومن المفترض إنك تحرك كل عجلة بالطول وبالعرض ولو لقيت الكاوتش بيروح وييجي يبقي ده معناه إن فيه بوش جامد في البلي ..
وعلي فكرة بلى العجل عمره الإفتراضى كبير وأعراض تلفه بتبقى واضحة جداّ وقيسوا على ذلك بقي أى رومان بلى متركب فى أى مكان في العربية ولما بتيجي تغير بلي العجل بتروح لميكانيكي يفك صرة العجل اللي قدام والأكسات اللي ورا ويبعتك للخراط مع بلي العجل وهو بيركبهم وأهم حاجة في بلي العجل التشحيم يعني هات علبة شحم نضيفة وخلي الميكانيكي يتوصى بزيادة عشان تنسى صوت النحر خالص وتحافظ علي البلي.