Question

الشتاء ❄ وييجي السؤال بتاع كل شتا .. أسخن العربية ولا لأ؟؟ طيب أسخنها قد ايه؟؟

Answer 1

أولا يعني ايه تسخين المحرك

هو رفع سرعة لفات الموتور RPM عن المستوى الطبيعي لحالة الخمول في المحرك لمدة معينة سواءاً أثناء التوقف أو حتى مع تحرك السيارة و يظل التسخين لوقت محدد حتى يصل المحرك لنقطة حرارة منتظمة ومناسبة في داخلة

-ليه فكرة تسخين العربية أصلاً؟؟

=عشان الكربراتير في العربيات القديمة مكانش بيعرف يشتغل كويس طول ما هو بردان, كان بيلخبط نسبة الهوا والبنزين اللي داخلين موتورك, يا اما يدخل بنزين قليل فالعربية تطفي لو حاولت تطلع بيها, يا اما يدخل بزيادة فتلاقيها بتطلع دخنة سمرة

عشان كدة تلاقي الناس اللي معاها عربيات قديمة دايماً تدور العربية وتفضل تزود بنزين شوية عالواقف كدة لحد ما العربية تبدأ تتدفي

-طب ولما بقت عربياتنا Injection يعني شغالة برشاشات بنزين؟؟

=خلاص المشكلة اللي فوق دي اتحلت وبقي كمبيوتر الرشاشات عارف كويس أوي يرش بنزين قد ايه .. مشغل معاه سنسور واقف علي مدخل الهوا بتاع الموتور يعرفله داخل أكسجين قد ايه عشان يرشله بنزين علي قده عشان كدة دايماً كمية البنزين هتبقي كافية ان الحريق يتم والمكنة تفضل دايرة مش زي الكربراتير..

-يبقي منسخنش العربوية؟؟

=اتقل بس .. هنا بقي لازم نصارحك بمشكلة تانية للعربيات الباردة

لما حررتك تكون راكن العربية تمن ساعات بالليل وتيجي تصحيها الساعة سبعة الصبح, خليك حاطط في بالك ان زيت الموتور دة بني آدم زيه زيك وبيبقي نايم في الكارتيرة ومتغطي .. وكتر البرد بتاع بالليل دة بيخلي اللزوجة بتاعته تعلي, يعني لما تدور العربية الزيت بيبقي كسلان كدة في حركته ومش بينتشر في الموتور بسرعة .. الطرمبة تقوله اطلع يلا عند الكامات فوق انجز :@

يروح باصصلها بقرف كدة ويقولها مابورراحة!

Answer 2

الخناقة دي بتاخدلها شوية وقت لحد ما الزيت يطلع فوق, وساعتها بيكون موتورك شغال من غير تزييت خالص عشان الزيت ملحقش يوصل يعني, فمتجيش انت بقي تقرص عالعربية وتطلع تخمس والمكنة لسة متزيتتش .. هي مش هتقول لأ .. بس عمرها الافتراضي هيقل عشان الأجزاء المتحركة فيها هتبقي بتاكل في بعضيها ومفيش زيت يليّن الدنيا بينهم

تالت سبب ان لو المحرك موصلش لدرجه حراره مناسبة هتزداد فيه كمية المواد الغير مكتملة الاحتراق والمواد ديه هتلتصق بالزبت وده هيؤدي الي تقليل فتره عمر الزيت.

تعرف اسباب تانية غير الي كتبناهم فوق ؟

-يبقي نسخن العربوية؟؟

=اركب عربيتك الانجكشن الجميلة .. لف مفتاحك لفة واحدة لحد ما لمبات العداد تنور .. استني لما شوية منهم يطفوا أو تلاقي عداد البنزين رفع عشان تكون الكهربا كملت عالحساسات زي ما بيقولوا .. دور عربيتك .. البس حزامك كدة وحط نضارتك وافتح شبابيكك واعدل مراياتك هتكون خدتلك نص دقيقة في الكلام دة .. حطها عالـ D يابا وطريقك أخضر ساعتها انت اتطمنت خلاص ان الزيت انتشر في المكان وبقت كل حتة في موتورك بتطرطش زيت ومبتاكلش في نفسها من كتر الاحتكاك وعمرها الافتراضي يزيد

. افضل ماشي بيها بالراحة لمدة تلت دقايق مثلاً أو لحد ما مؤشر الحرارة يرفع لدرجته الطبيعية .. واقرص بقي يا برنس

الزتونة:

1- معاك عربية قديمة يبقي دورها وسيبها تسخن زي ما الحاج علّمك تعمل..

1.5- معاك جديدة يبقي هما تلاتين ثانية عالسلانسيه واطلع من غير ما تقرص..

2- لو انت عايش في سيبيريا وبتنزل تلاقي العربية متلجة زي الخنفسة دي سيبها تسخن حبة كمان..