الـSP-III مواصفة زيت الفتيس بتاعت ميتسوبيشي أساسا.. واستخدمتها كل الشركات اللي بتشتغل بالتعاون معاها (بروتون - هيونداي/كيا.. وحتى بعض موديلات كرايزلر/دودج القديمة شوية)..
الـDX-III هي كود بيتكتب على بعض زيوت الفتيس علشان تقوللك إن الزيت ده مطابق لمواصفة ديكسرون ٣ Dexron III..
ومواصفات ديكسرون في الأساس أصدرتها جنرال موتورز للاستخدام في عربياتها.. وفي وقت من الأوقات كانت ديكسرون هي المواصفة شبه الوحيدة في زيوت الفتيس في العالم... ومن منتصف التسعينات بدأت شركات السيارات تعمل لنفسها مواصفات خاصة لإن مواصفات ديكسرون مش بتحقق الطلبات اللي هما محتاجينها في الفتايس الأوتوماتيك بتاعتهم.
خد بالك...
الفتيس الأوتوماتيك بالذات ما ينفعش فيه لخبطة ولا استرخاص.. ومش أي حاجة تمشي الحال.
الفتيس الأوتوماتيك متصمم علشان يستخدم الزيت بتاعه هو وبس.. مش أي زيت تاني.. ولا حتى زيت قريب منه.