نقدر نقول إن البوجيهات وظيفتها الأساسية هي إنها تحرق خليط البنزين في غرفة الإحتراق تحت أي ظرف من الظروف وكفاءتها بتعتمد على نظام الحريق نفسه اللي بيديها الفولت اللي بتحتاجه وكمان كفائة البوجيه بتعتمد علي مدى تخلص سن البوجيه نفسه من الحرارة عشان ميحصلش حاجة أسمها إشعال مسبق pre-ignition
البوجيهات مهما كان نوعها مش هتضيف HP للمكنة بتاعتك عشان فيه ناس معتقدة إن نوع البوجيه بيزود القدرة الحصانية للمكنة وده غلط ولكن هي الفكرة كلها إن نوع البوجيه النضيف بيمنع إن المكنة تفقد القدرة الحصانية بتاعتها
فيه حاجة بقي أسمها المدى الحراري Spark Plugs Heat Rating وده عبارة عن مؤشر بيعبر عن مدي تخلص سن البوجيه من الحرارة لكن المدى الحراري ده مبيعبرش عن كفاءة الإشعال بتاعة البوجيه عشان محدش يختلط عليه الأمر ولكن هو بس بيعبر عن مدى حرارة سن البوجيه اللي البوجيه بيشتغل فيه بكفاءة وبنعبر عنه بأرقام
فيه بقي معلومة حلوة ممكن تفيدك وهي إن كل ما الرقم ده صغر يعني البوجيه ساخن وكل ما الرقم كبر يعني البوجيه بارد وبيبقي بين كل رقم ورقم حوالي 100 درجة مئوية والأرقام دي مش بتبقي ثابتة مع كل الشركات لأنها ممكن تختلف من شركة للتانية فمثلاّ شركة زي NGK الأرقام بتاعتها بتبقي من 2-4 "ساخن" ومن 7-10 "بارد" في حين إن مثلاّ شركة زي POSCH العكس تماماّ لأن الأرقام بتبقي فيها من 2-4 "بارد" ومن 7-10 "ساخن"
عوامل التصنيع هي اللي بتحدد المدى الحراري للبوجيه :-
1-مساحة وطول السن العازل للبوجيه
2-الموصلية الحرارية للسن العازل
أهم عامل في الأتنين دول هو العامل الأول عشان طول السن العازل كل ما كان كبير فا كدة هو بيحتفظ بالحرارة بشكل أكبر فا بيكون البوجيه من النوع الساخن والعكس صحيح بحيث إن مع السن العازل القصير فا بيكون البوجيه من النوع البارد
المدى الحراري لسن البوجيه بيتراوح ما بين 5000 لـ 8000 درجة مئوية ولو مخترتش المدى الحراري المناسب للمكنة بتاعتك فا ده ممكن يسبب مشاكل للمكنة
طيب إزاي أختار المدي الحراري المناسب للمكنة ؟!
1- لو المكنة بتشتغل علي RPM عالي أو أنت بتفتري كتير علي المكنة بتاعتك ودايماّ بتمشي بسرعة يبقي أنت هتختار بوجيه بارد عشان تتخلص من الحرارة بتاعتها بسرعة
2- أما بقي لو المكنة بتشتغل علي RPM قليل وأنت أصلاّ دايماّ بتمشي بطئ أو بسرعة مناسبة ومش بتحمل علي المكنة جامد يبقي أنت هتختار بوجيه ساخن عشان ميحصلش للبوجيه تلوث كربون
3- لو كانت المكنة عندك فيها تربو أو سوبرتشارجر يبقي برضو هتختار بوجيه بارد
يعني من الأخر ملخص القاعدة بوجيه ساخن لمكنة باردة أو بمعني أصح جهدها قليل وبوجيه بارد لمكنة ساخنة أو بمعني أصح جهدها كبير
طب إيه الأسباب اللي ممكن تخلي البوجيه يتلوث بالكربون ؟!
1- إنك دايماّ تمشي علي سرعات بطيئة
2- إنك بتختار بوجيه بارد أكتر من اللازم أو إنك تختار بوجيه بارد لمكنة جهدها ضعيف
3- إن المكنة تكون خفيفة
4- إن الشرارة تتأخر
خليك عارف إن تلوث بوجيه واحد من الـ 4 أو من الـ 6 أو أياّ كان العدد بالكربون يبقي أنت كدة خسرت ربع قوة المكنة لأن الموضوع ده يشبه إنك تبقي راكب حصان قوي بس رجله مكسورة وخليك عارف لو حصلت مشكلة التلوث بالكربون أكتر من مرة يبقي الأحسن ليك إنك تجيب بوجيهات ساخنة ولو كنت من الناس اللي بتستخدم بوجيهات باردة يبقي أنت لازم تمشي بعربيتك علي سرعات عالية كل فترة وتحرق علي الغيار التاني والتالت عشان البوجيهات تنضف نفسها
أنت تعرف إن الظاهرة بتاعتة التسقيف Detonation لو حد يسمع عنها سببها الرئيسي البوجيهات لأن في الطبيعي شرارة البوجيه بتبقي مظبوطة بحيث إنها تحصل لما يكون البستم في النقطة الميتة العليا لشوط الإنضغاط أما لو حصل والشاراة حصلت قبل كدة فا ده هينتج عنه إن الضغط هيزيدد جداّ جوة غرفة الإحتراق وده هيخلي المكنة تخسر جزء كبير من الطاقة بتاعتها والمكنة تسقف