سؤال ضرورى عن المساعدين

Question

عايز اتأكد إن المساعدين عندى كويسين ومفيش فيهم أي مشكلة

Answer 1

هتضغط بالراحة علي المساعد اللي أنت شاكك فيه تضغط وتسيب الصح اللي المفروض يحصل إن العربية تطلع لفوق بس من غير مرجحه يعني أول ما تسيب جسم العربية هتلاقيه طلع وثبت في مكانه مش يطلع وينزل وبعدين يطلع تاني !! لأن لو حصل فيه العكس يبقي المساعد ده فيه حاجة مش مظبوطة والمفروض إن المساعد وهو بينزل ويطلع يبقي ملوش صوت تماماّ وتلاقي العربية وهي بتنزل تقيله وكما وهي بتطلع تحسها تقيله وماسكة نفسها مش زي الجيلي !!

عشان برضو تتأكد من إن المساعد تمام أنزل بص عليه من تحت من عند الكاوتش ويستحسن يكون الكلام ده الصبح وحط إيدك عليه كدة وشوف هل جايب زيت ولا لأ لأنه لو لو جايب زيت يبقي المساعد ده ضارب زيت ولازم يتغير لأن معني إنه ضرب زيت إنه فقد قوة الكبس بتاعه وبالتالي مش هيمتص أي صدمه اللي هي وظيفته الأساسية أصلاّ !!