أنظمة الفرامل ال ABS وال EBD واللى دايما بنسمع عنهم فى مواصفات كل عربية وكتير مننا ميعرفش هما ايه أصلا أو ايه فايدتهم. واحنا نقدر نستفيد منهم ايه كأوبشن ,وليه بيدِّفع فيهم فلوس لو كانوا أوبشن اختيارى فى العربية , و ليه العربية صاحبة المواصفات دي بتبقى واخدة وضعها كعربية صاحبة مواصفات امان عالية وسمعة حلوة وسعر غالى نسبيا. هنبدأ بالفرامل الABS واللى هى اختصار لـ Anti-lock braking system أو نظام منع انغلاق المكابح . وباختصار نظام منع انغلاق المكابح فايدته إنه بيمنع توقف العجلات عن الدوران اثناء الفرملة. ببساطة شديدة لو انت واخد سرعة وفجاة ظهر عائق أدامك واضطريت إنك تفرمل بسرعة فرملة جامدة هتلاقى من الصعب جدا إنك تحول اتجاه العربية يمين أو شمال ولوعملت كده وأنت بتفرمل هتلاقى العربية بتتزحلق وبتسحبك لقدام فى نفس الاتجاه. النظام ده بيمنع كده وبيحافظ على التلامس بين الارض والكاوتش ويخليك تقدر تتحكم فى العربية اثناء الفرملة الشديدة. نظام EBD وهى اختصار لElectronic brakeforce distribution أو نظام توزيع قوة الفرملة الكترونيا وهو نظام فرعى من الABS ودايما بيبقى مرتبط بيه والنظام فايدته إنه بيضبط توزيع الفرامل على ال4 عجلات الكترونيا على حسب الطريق والسرعة والحمولة وفى أغلب الاحيان بيوزع الفرملة من العجل الامامى للعجل الخلفى منعا للانزلاق كمان فى حالة لما تكون العربية بتاخد ملف على سرعة فهو بيوزع الفرامل من اليمين للشمال والعكس بطريقة شبه ممتازة.