ممكن تغير زيت بنفسك ....
هتسيب العربيه تبرد خالص وتجيب حاجه تفرشها تحت العربية وتجيب جركن قديم وتفتحه وتعمله حوض وتحطه تحت الطبة بتاعة الزيت وتجيب مفتاح مقاس الطبه وتفكه وتسيب الزيت يفضى خالص وبعد كده تركبها تانى وتقرطها
وتطلع تحط الزيت ولو هتغير فلتر يبقى تحط 4 كيلو
مش هتغير يبقى تحط 3.5 كيلو
تعرف انك ممكن تغير فلتر بنزين بنفسك يعنى ساعتك هتبطل العربيه وتنزل تفك الخرطومين اللى داخلين على الفلتر وتغيره .....
تعرف انك ممكن تنصف البوابة بتاعة المانفول بنفسك
يعنى تفكها وتغسلها وتنضفها باسبراى وتركبها تانى وتنضف معها حساس الايدل بالمرة...
وتتاكد ان الجوان بتاعها سليم ولو مش سليم تروح تعمل غيره وتركبها
تعرف انك ممكن تفك فلتر الهواء بتاعك كل اسبوع وتروح عند اى حد بتاع كاوتش وتخليه ينفخهولك وترجع تركبه تانى هتلاقى العربيه فاقت وكلنا هنفرح
تعرف ان لو عندك ترشيح زيت من غطاء التاكيهات ممكن تفكه وتغسله ببنزين وتشوف الجوان بتاعه لو بايظ تغيره ولو سليم تجيب هلبة سليكون من ١٠ جنية دى وتحط عليه لمسة سيلكون وتركبه وتسيبه ينشف وبكده خلصت اللعبة
بس اهم جاجه تطهر الوش نفسة ببنزين وكذلك الوش بتاع العربيه عشان ميبقاش عليه زيت والسليكون يقفش فيه
تعرف انك لما لمبة فى اى فانوس عندك فى العربيه تتحرق انت ممكن تفك الفانوس وتغيرها بنفسك عادى جدا
تعرف بردوا ان اى لمبة فى شاشة العدادات بالنسبة للعربيات القديمه لو اتحرقت انت ممكن تفك العدادات وتغيرها بنفسك
قبل اى حاجه من دول لازم تكون بتعرف تغير فردة الكاوتش على الاقل
ولو مش عارف تعمل اى حاجه بلاش تعملها وروح للصنايعى عشان مفيش اى حاجه تكسر ويحدث خسائر ( عافنا الله واياكم ) ✌✌