عداد الـ RPM ده عداد بيقيس عدد لفات الموتور فى الدقيقة الواحدة بمعنى أوضح إنه بيقيس عدد لفات عمود الكرنك فى الدقيقة الواحدة وبيشتغل وأنت ماشى بالعربية عشان يعرفك إن عمود الكرنك ماشى بسرعة كام لفة في الدقيقة الواحدة.
أما عداد السرعات وظيفته إنه بيقيس سرعة العربية من خلال حساس راكب على الفتيس وده طبعاّ بيبقى بالكيلومتر وفى بعض العربيات الرياضية بيبقى بالميل والعدادين دول بيشتركوا فى حاجة واحدة إنهم بيشتغلوا طول ما العربية ماشية وبيقفوا لحظة وقوف العربية فا مثلاّ وأنت ماشى بسرعة 60 كيلومتر على الغيار التالت وليكن هتلاقى عداد الـ RPM على 3 أو 4 ولو جبت الغيار الرابع على نفس السرعة اللى هى 60 كيلومتر هتلاقى عداد الـ RPM قل جداّ وبقى 2 أو 2.5 والعكس لو جبت الغيار التانى على 60 كيلومتر هتلاقى عداد الـ RPM بقى على 4 أو 5.
العلاقة بينهم بتبقي موجودة عن طريق الفتيس والكورونا والكاوتش وفي بعض كتالوجات العربيات بيبقى مكتوب نسب تخفيض التروس بتاعة الفتيس والكورونا، وبناءّ عليها بيتعمل عداد السرعات وطبعاّ النسب دي بتختلف من عربية للتانية.