عايز تعرف أيه هى أسباب ضعف سحب العربية

Question

Answer 1

هى العربية الاول بتشتغل ازاى ببساطة كدة ؟

شوية هوا على شوية بنزين فى أسطوانة الموتور وهو المقصود بية الـ " Cylinder "

وشرارة من البوجيهات والموتور يشتغل ينقل الحركة للفتيس .. الفتيس ينقل الحركة للعجل

عشان كدة اسمة ( ناقل حركة ) شوفت بسيطة ازاى مش محتاجة

● خلينا نمسكها واحدة واحدة كدة ومن الصغير للكبير ..

يُعدّ المحرّك هوَ قلب السيّارة الذي دونه لا وجود لحركة السيّارة على الإطلاق، وضعف السحب قد يكون من المحرّك أو من أحد الأجزاء المتصّلة به، لذا يجب أوّلاً التأكد من سلامة المحرّك عن طريق فحصه لدى مراكز الفحص المعتمدة والتأكد من سلامته في الأساس كعدم وجود الدّخان المتسبّب في تآكل الزيت داخله، أو نفخ الزيت وتقلّبه داخل غرفة المحرّك، أو خلل في البستونات وما شابه ذلك.

1 - الهواء ..

فلتر الهوا طبعا مؤثر جدا لو مسدود او مش نضيف بيأثر على العربية جدا ودة عن تجربة

جرب تنضف فلتر الهوا بتاعك لو لسة جديد هتلاقى السحب اختلف وياريت كل 20 الف تغيرة .. وتجيب واحد جديد ...

بوابة الثروتل .. او بوابة الهوا

لو مش نضيفة عتلاقى الموتور ميت مش ضعيف بس .. فكها كل فترة كدة ونضفها ..

Answer 2

2 - البنزين ..

شوف يا سيدى دورة البنزين لو مش نضيف فيها شوايب يعنى هتقلل من سحب العربية

حط من بنزين نضيفة بقى

● غير فلتر البنزين كل 25 الف كيلو

● كل 3 شهور ابقى حط مرة اوكتان عشان تخش تنضف دورة البنزين وتخش على الرشاشات تنضفها ولو عربيتك بتاخد 92 حطلها برضة 95 كل 3 شهور مرة مع الاوكتان هتعمل معاك شغل فاجر وربنا

_________________

3 - البوجيهات وسلوكها ...

البوجيهات مهمة جدا والناس لما بتيجى تغير البوجيهات مش بتغير السلوك ..

● ولازم كل 25 الف كيلو تغير طقم بوجيهات ..

لان مع الوقت بتكون طبقة كاربون كبيرة عليها وشرارتها بتضعف و بالتالى السحب بيقل و كمان ممكن العربية متدورش معاك من اول مرة عشان البوجيهات ضعفت خلاص ...

_______________

4 - الفتيس ...

الفتيس طبعا مهم جدا فى نقطة السحب ..

لو الاسطوانة والديسك متاكلين وبيجيبو اخرهم بيخلى سحب العربية يقل وكمان يخلى العربية تسخن فوق العادى وكمان هتحتاج تعزم ليها جامد لان الاسطوانة بتكون فضيت وبالتالى هتاكل بنزين زيادة

Answer 3

5 - الكاوتش ...

الكاوتش علية عامل كبير جدا ..

لو الطبقة مشققة او متاكلة او عديت ال 35 - 40 الف كيلو بالكاوتش اللى معاك يبقى ياريت تغيرة احسن ... لانة بيبقى كمان عرضة انة ينفجر او يفتل معاك فى اى لحظة وكمان هياكل بنزين ويقلل السحب ..

__________

6 - حساس الشكمان ..

او اللى اسمة حساس الاكسجين دة لو بايظ او بيودع الحياة خليط الهوا والبنزين مش هيبقى بالنسبة المظبوطة ويقلل السحب ..

_______________

7 - الرشاشات

ازاى ؟ لو فى رشاش تعبان .. هيعمل حاجة من الاثنين هيرمى بنزين زيادة عشان يولع مع الهوا ويتم الاحتراق وبالتالى العربية تاكل بنزين

او هيرمى بنزين اقل من المطلوب يقوم يسبب ضعف فى السحب طب والحل ؟

انك تعمل اختبار رشاشات كل 50 الف كيلو ودة بيبقى عن طريق جهاز بيختبر قوة الرشاشات

وبينضفها وهتلاقية فى اى مركز صيانة نضيف .