البلاستيك ديب ده عبارة عن أنابيب صغيرة كدة زي الإسبراي ترشها على أي حاجة بسهولة جداّ وبتاخد حوالي دقيقتين وتنشف أما بقي لو هترش بيه العربية مفيش مشكلة عادي جداّ بس قبلها تغسل العربية غسلة كويسة وبالراحة وبعد كدة تبدأ ترش بس أهم حاجة متحكش بليفة خشنة أو أي حاجة حادة والأهم والأهم إنك تركنها بعيد عن العالم اللي بتيجي بمسمار تعمل خطوط علي العربية
طب في حالة إنك هتعمل بيه جنط برضو مفيش مشكلة بس ياريت الأول تحله من العربية وتقعد تعمله براحتك
طب البلاستيك ديب ده ليه أضرار علي العربية بشكل عام ؟! لأ خاااااالص
طب بيتشال إزاي ؟! تشوف أي طرف وتشده بيطلع بسهولة جداّ كأنه كيس بلاستيك ومش بيسيب أي اّثر تحته نهائي وده علي فكرة حل حلو للناس اللي بتبقي عاوزة ترش لون مط وبيبقي فيه منه ألوان
وياريت نصيحة للناس اللي بتحب ترش الجنوط أسود ترش بيه بدل الفرشة أو الرش العادي لأنه هيبوظ ومش هتعرف ترجعه تاني
بابنسبة لأماكن بيعه فا هو بيتباع في أي محل من محلات التعديل في مصر وبالنسبة لسعره متدفعش فيه أكتر من 100 جنيه
أما عن الكمية فا إزازتين كفاية أوي إنك ترش بيهم الـ 4 جنوط بتوع العربية
