في البداية نعرف مع بعض إيه هو التربو أصلاّ ؟!
تعريف التربو :- التربو عبارة عن مجموعة من الشواحن التوربينية ودي بتبقي عبارة عن أجهزة بتساعد المكنة على حرق كمية أكبر من البنزين وده عن طريق إدخال كمية أكبر من الهواء للمكنة مع ضغطه طبعاّ بصورة أكبر بكتييييير عشان يزود من نسبة حرق البنزين جوه غرفة الإحتراق (( الفرن )).
فكرة عمل التربو :- فكرة عمل التربو بتتلخص في إنه بيضخ ويضغط كمية أكبر من الهواء للمكنة عن طريق المروحة المثبتة فى التربو واللي بتدور عن طريق دفع غاز العادم ليها يعني من الأخر غاز العادم بيستفيد منه التربو في دوران المروحة بتاعته وطبعاّ مروحة التربو دي بتدور بسرعة رهيبة جداّ ممكن توصل إنها تكون أسرع في الدوران من أسرع محرك في العالم لأنها بتدور بمقدار ممكن يوصل لحوالي أكتر من 150 ألف دورة فى الدقيقة الواحدة.
مكان تركيبه في المكنة :- التربو بيتركب في الأجزاء دي وبس عشان محدش يفتي كتير :-
1:فتحة أدخال الهواء للمحرك
2:فتحة خروج العادم
3:فلتر الهواء ويفضل يعني لو يكون فلتر رياضى.
ملحوظة مهمة جداّ " يراعى لما تيجي تركب التربو إنه يتركب فى أبعد مكان نسبياّ عن المكنة عشان حرارة المكنة متأثرش عليه وعلي أدائه بالسلب ".
طبعاّ لازم نكون عارفين إن درجة حرارة المكنة هتزيد بشكل كبير جداّ جداّ نتيجة لزيادة نسبة الإحتراق والزيادة دي هتعمل نقص في العمر الأفتراضى للمكنة ده إن المكنة لقدر الله منفجرتش أصلاّ !! ومحدش يستغرب من اللي بقوله بس دي بتبقي نتيجة متوقعة لعدم تحمل البساتم للضغط والحرارة الزيادة أوي دول ولكن طبعاّ ممكن نتغلب على المشاكل دي بكل بساطة !! طب إزاي بقي ؟!
من خلال الطرق دي هتحمي المكنة من الاّثار السلبية للتربو :-
أولاّ :- عشان تتغلب على مشاكل الحرارة أول حاجة هتركب ريدياتير رياضى أو أى ريدياتير حجمه أكبر من اللي في المكنة وطبعاّ بيتوجدله مكان .. تاني حاجة هتركب مبرد داخلى للمكنة وطبعاّ ده هيبقي له دور كبير في تبريد درجة حرارة المكنة .. تالت حاجة هتركب التربو فى أبعد مكان عن المكنة زي ماا قولت فوق .. رابع حاجة هتحاول تعمل فتحات تهوية فى غطاء المكنة أو فى الأكصدام الأمامى للعربية (( زي الصور كدة )).
ثانياّ :- بالنسبة للبساتم هتغير البساتم العادية اللي في المكنة عندك ببساتم رياضية مصنوعة من مواد ليها قدرة كبيرة على تحمل الضغط و أسمها ( Pressure Pistons ).
أنواع التربو :- النوع الأول من أنواع التربو أسمه (( شاحن فردى )) يعني بنركب فيه شاحن توربيني واحد بس .. النوع التاني أسمه (( شاحن تتابعي )) يعني بنركب 2 شاحن توربيني واحد منهم كبير اللي هو الأساسى و التاني صغير بنستخدمه فى البداية بس عشان يدينا Power أكبر لأن سرعة دورانه بتكون أسرع بكتير من الكبير .. النوع التالت أسمه (( شاحن تتابعي )) برضو ولكن بيبقي موديل تاني بس المرة دي بقي يختلف عن التاني في إنه بيركب فيه 2 شاحن توربيني من نفس الحجم وفى الحالة دي أكيد هنحصل على ضغط أكبر بكتير أوي والضغط ده مش هبقي ببالغ لو قولت إنه ممكن يخلي العربية تطير من علي الأرض.
أما بقي لو هنتكلم عن الفرق بين السوبرشارجر SUPERCHARGERS والتربو TURBO
لازم أولاّ نفهم عملية مبدأ الشحن أو الـ FORCED INDUCTION
FORCED INDUCTION :
مبدأ الشحن هو عملية إدخال كمية أكبر من الهوا للمكنة والمبدأ ده نفسه بتستخدمه أنظمة التوربوشارجر وحتى أنظمة الغاز NOS.
طب إيه هو بقي السوبرشارجر SUPERCHARGERS :
في السوبرشارجر الوضع بيختلف شوية في إيه بقي ؟! في إن الكومبرسر الخاص بيه بيبقي مربوط بعمود الكرنك crankshaft .. يعني كل ما زادت حركة عمود الكرنك زادت سرعة السوبرشارجر ودي تعتبر أهم مميزات السوبرشارجر
أنواع السوبرشارجر:-
Positive Displacement
Centrifugal
وعشان مطولش عليكم الـ Positive Displacement بيوفر عزم متساوي على كامل مجال دورات المكنة لكنه بيبقي أقل في الفاعلية والعزم اللي بيطلعه بيكون أقل من النوع التاني اللي هو الـ Centrifugal واللي بيعتبر أكتر إستخداماً وبيدي طاقة فورية بتزيد تدريجياً مع زيادة عدد دورات المكنة يعني نسبة وتناسب
مميزات السوبرشارجر إنه بينتج قوة فورية وأسرع من التربو
عيوبه بقي إن القوة القصوى اللي بينتجها بتبقي أقل من التربو
من الأخر كدة التربو يعتبر عملياّ أفضل من السوبرشارجر وأنا حاولت بأقصي جهد أختصر الموضوع وأتكلم بطريقة بسيطة جداّ من غير مصطلحات علمية تماماّ بحيث الكل يقدر يفهمه من غير جهد .. 
