الدينمو فكرة عمله بكل بساطة إنه عبارة عن جهاز بيحول الطاقة الميكانيكية لطاقة كهربية بمعني إنه جهاز ماشي عليه سير أسمه سير الدينمو وأكيد طبعاّ كلنا سمعنا عنه وعن مشاكله لما بيتقطع وبيبقي بصراحة من المشاكل المقرفة اللي ممكن تواجه أي حد .. طب نرجع تاني بقي السير ده بيبقي عبارة عن حلقة وصل بين الدينمو نفسه عشان يحرك الملفات الكهربية الموجودة جواه طبعاّ في وجود مجال مغناطيسي وبين المكنة إنه بياخد الحركة الميكانيكية منها وبكدة تتولد الطاقةالكهربية
طيب أتولدت الطاقة الكهربية خلاص جوه الدينمو وعرفنا إزاي طب برضو مقولناش إيه اللي بيحصل بعد كدة ؟! تعال نعرف بقي مع بعض
الدينمو بيبقي خارج منه وصلتين الوصلة الأولي بتروح علي البطارية تشحنها والوصلة التانية بتروح للكتاوت والفيوزات
طب هو ليه أصلاّ بيبقي في العربية دينمو عشان يشحن البطارية ؟! طب ليه العربية متشتغلش بالجهد الكهربي الخارج من البطارية ؟! طب ليه لما سير الدينمو يتقطع أو الدينمو نسفه يفصل ليه لمبة البطارية بتنور ودايماّ يقولوا أنت كدة ماشي علي البطارية ؟!
هنبدأ إجابات الأسئلة دي بقي مع بعض واللي أكيد في يوم من الأيام سألتها لنفسك أو لأي حد ! مبدئياّ كدة البطارية كمصدر تيار كهربي لا تكفي إنها تشغل العربية أكتر من 10 دقايق أو ربع ساعة بالكتير أوي أوي ليه بقي لأن العربية لو أعتبرناها مكنة أو أعتبرناها مستهلك كهرباء من خلال كل جزء بيبقي فيها مش بيشتغل إلا من خلال الكهربا فا البطارية بكمية الفولتات اللي بتخرج منها متكفيش إنها تشغل كل ده مع بعض !
فا من الطبيعي جداّ بعد وقت معين هتقوم تفصل شحن لأن خلاص جابت أخرها فا هنا بقي بيظهر الدور الجوهري للدينمو و زي ما قولت فوق إنه مولد كهربا يعني بظبط ومن الأخر أنت لما بتبقي ماشي بالعربية ومشغل الكاسيت وعدة الصوت والفوانيس والزينون وغيره وغيره ! أنت كل ده في الحقيقة بتبقي ماشي بفضل وجود الدينمو مش بفضل البطارية