المكنة خفيفة بكل بساطة كده يعني محتاجه عمره والبساتم مش شغاله بكفائة عالية وضغط البنزين والهوا مش علي الكفائه اللي المفروض تشتغل بيها المكنة وده بيزود من أستهلاك البزين عشان كدة تلاقي اللي المكنة عنده خفيفة هتلاقيها بتسحب بنزين بشكل كبير عشان تعوض واللي مكنته خفيفه برضو هتلاقيها بتاكل زيت جامد جداّ والزيت بيقل في المكنة بشكل ملحوظ كل فترة وكل ما يقل أكتر كل ما المكنة تبقي خفيفة أكتر واللي مكنته خفيفة برضو هيلاحظ إن فيه تعريق زيت على البوجيهات وده معناه إن شنبر الزيت خفيف والزيت بيدخل مع الحريق.
وأشهر حاجة تدل علي إن مكنتك خفيفة هتلاقي دخنه بيضا مايلة للون الأزرق من الشكمان وحل الموضوع ده إن يا إما تعمل عمره أو نص عمره علي حسب الحالة الفعليه للمكنة.
في العربيات القديمة لو عايز تكشف برضو علي مكنتك إذا كانت خفيفة أو لأ بطريقة بلدي شوية هتسد الشكمان من ورا بحتة قماشة بإيدك والعربية على السلانسيه لو المكمة خفيفة هتلاقيها ما تبطلش أو تتبرجل بش شغاله برضو إنما لو المكنة كويسة المكنة هتبطل أو تتبرجل جامد جداّ وهتبطل أما فى العربيات الحديثة كبس المكنة بيتقاس بجهاز كدة معين.
طب والحل بقي , الحل ده أولاّ أنا بعتبره حل مؤقت للمشكلة يعنى ممكن تفضل عايش على الكلام ده كام سنة لحد ما غصب عنك هتفتح المكنة عشان تتعمر ..
الحل ده بيتوقف على نوع العربية و حالة المكنة يعنى لو عربية قديمة والمكنة خفيفة شوية هتحط زيت تقيل زى شل x100 طب لو خفيفة بدرجة أكبر شوية هتحط مع الزيت التقيل زيت شنبر أما بقي لو العربية حديثة مش هينفع معها الكلام ده خالص لأنك أتقل زيت ممكن تحطه لها هو شل الأحمر.
طب أنا إزاي أتفادى إن المكنة تبقي خفيفة ؟! متحاولش تقرص على الغيارات كتير وبالذات في الغيار الأول ولما تبقي ماشي بالعربية متقومش قارص بنزين مرة واحدة للأخر !