0 تصويتات
في تصنيف إطارات وجنوط بواسطة (10.4k نقاط)

1 إجابة

0 تصويتات
بواسطة (10.4k نقاط)

في ناس كتير بتروح تجنط وخلاص على الرغم من إن موضوع الجنوط ده من أهم الحاجات اللي في أي عربية وممكن جنط مش مظبوط يبوظلك العفشة ويبهدلك العربية ويبوظ ثباتها وأنت سايق وعلي سرعة.


طب أصلاّ إيه اللي بيخليك تغير جنوطك بجنوط رياضية ؟! أول سبب طبعاّ إن شكلها أجمد بمراحل و بيخليك تحس إنك جبت عربية جديدة وطبعاّ يمكن هو ده السبب الوحيد اللي بنهتم بيه لكن كمان لازم تكون عارف إن الجنوط الرياضية بيكون وزنها أخف من الجنوط الحديد العاديه وده بيخليها توفر في أستهلاك البنزين و تحسن من تسارع العربية وكمان بيخلي التوجيه دقتة أحسن وبيبقي خفيف يعني تحس فعلاّ إن الطارة خفت تحت إيدك وطبعاّ معظم الناس مش بتحس بالميزة دي عشان في معظم الأحيان الناس بتعرض الكاوتش جامد مع تغيير الجنوط وده بيزود الإحتكاك مع الأرض ويخليك متحسش بالتحسن في الطارة فوق ده كله الجنوط الرياضية أساساّ معموله من سبايك معدنيه بتديك صلابة وقوة وكمان بتفقد الحرارة بسهولة و بالتالي الفرامل والكاوتش بيكونوا باردين وده بيديك فرامل أحسن لأن الكاوتش أبرد ومش بيتزحلق علي الأرض و تيل الفرامل كمان أبرد فا بيمسك أكتر.


أما عن أنواع الجنوط بقي فا عندك حاجات كتير وفيه منها الغاليه زي BBS و OZ و MOMO و ENKEI و ADR و American Racing وطبعاّ فيه بقي من الجنوط الكوري و الهندي و الصيني و التايواني و أنا بعتبر أحسنهم التايواني بصراحة وفي مصر بالأخص أهم حاجة تشتري من محل محترم وبلاش تسترخص عشان الغلطة في الحاجات دي بموته (عافانا الله وإياكم).


هنتكلم دلوقتي عن شرح بسيط وغير مفصل أوي لأهم عناصر أختيار الجنوط وفقاّ للحسابات الصحيحة واللي أنت لازم كمشتري تراعيها قبل ما تحط فلوسك في أي جنط


في البداية كدة قبل أي حاجة لازم نكون عارفين إن فيه حاجة أسمها الـ Diameter اللي هو القطر وده طبعاّ أكيد معظمنا عارفينه اللي هو 15 إنش و 16 إنش.

وطبعاّ برضو الـ Width اللي هو العرض وده بيبقي عرض الجنط الداخلي من أول طرف فيه لأخره وبيبقى 5.5 إنش أو 6.5 إنش أو 7 إنش علي حسب يعني.


أولاّ: بالنسبة لعدد المسامير وقطر دايرة المسامير فا غالباّ بتكون العربيات الملاكي في مصر يا إما 4 مسامير أو 5 مسامير على أقصى تقدير يعني أنت بقي ما عليك إلا إنك هتحسب المسافة بين المسامير في حالة المسامير الأربعة من آخر فتحة مسمار لنهاية فتحة المسمار المقابل ليه وفي حالة المسامير الخمسة تحسب المسافة بين فتحة مسمار لنهاية المسمار اللي بعده

بعد كده نحسب قطر دايرة المسامير ودي المعادلة بتاعتها :-

في حالة الأربعة مسامير يبقي المسافة بين المسامير / 0.7071
في حالة الخمس مسامير يبقي المسافة بين المسامير / 0.5878


ثانياّ: حساب الـ offset بتاع الجنط والـ offset ده للي مش عارف هو المسافة بين نص الجنط بظبط اللي هو (مكان المسامير يعني) وبين محور تركيب الجنط

طب عشان نحسب الـ offset هنعمل إيه ؟!

لازم تعمل الآتي وخد بالك إن يكون الجنط على وشه على أرض مستويه:

1- هتحسب المسافة من مكان المسامير لحد أخر الجنط من النص
2- هتحسب عرض الجنط من الجنب
والـ offset في الحالة دي يبقي ناتج طرح 1 من 2 علي الـ 2 .. مثال " 8-4 / 2 "


الـ Offset ده بيبقي حاجة من تلاته :-

- يا إما zero offset ودي متعملش مشاكل مع العربية.
- يا إما negative offset والمقصود إن الجنط من مكان المسامير هيبقى داخل على الفرامل والطنابير.
- يا إما positive offset وده معناه إن الجنط من مكان المسامير هيبقى أبعد للفرامل والطنابير عن الجنط الأصلي.


طبعا zero offset هو الصح غير كده بقي لازم تعمل تظبيط fitments يعني تركب رينجات مثلاّ حسب الحالة وطبعاّ لو ركبت الجنوط والـ offset في حالة من الأتنين التانيين يبقي أستحمل بقى الغربلة والرفة وبلي العجل اللي هيبوظ ده غير الكبالن يعني العفشة عموماّ وفيه جنوط بيبقى مكتوب عليها الـ offset بتاعها جاهز.


بالنسبة للـ offset ملحوظة مهمة جداّ أحب أقولها لملاك عرييات الدفع الامامي بالنسبة لعربيات الدفع الأمامي أنت هتركب جنوط إزحتها موجبه وممنوع تركب سالب أبداّ لأنك لو ركبت سالب جرب كده ومع أول ملف العربية هتتقلب وعامةّ متقلقوش من حاجة لأن 99% من الجنوط اللي في مصر موجب أصلاّ.


طب إيه هي الرينجات دي بقي اللي قولنا ممكن نركبها ؟!

الرينجات دي بتبقي عبارة عن حلقات ممكن تبقى ألومينيوم أو بلاستيك وبتتحط في الفراغ الموجود بين الجنط والأكس يعني مثلاّ أنا العربية عندي مقاس مركز التجويف بتاعها 66.1 مم والجنط اللي أنا عايز أجيبه 73 مم يبقي ده معناه إني محتاج رينجات بالفرق بين المقاسين اللي هو 6.9 مم أو 7 مم والأفضل من وجهة نظري إنك تاخد الرينجات دي من عند اللي بايعلك الجنط عشان يركبهوملك وقت تركيب الجنط.

اسئلة متعلقة

0 تصويتات
1 إجابة
سُئل أكتوبر 11، 2016 في تصنيف نقاشات عامة عن السيارات بواسطة WilfredoFiel (10.4k نقاط)
0 تصويتات
1 إجابة
0 تصويتات
1 إجابة
سُئل فبراير 28، 2016 في تصنيف المحركات بواسطة WilfredoFiel (10.4k نقاط)
0 تصويتات
0 إجابة
سُئل فبراير 25، 2017 في تصنيف إطارات وجنوط بواسطة HesterPawsey (120 نقاط)
0 تصويتات
1 إجابة
سُئل فبراير 28، 2016 في تصنيف إطارات وجنوط بواسطة WilfredoFiel (10.4k نقاط)
...