في البدايه إيه أصلاّ الدبرياج ده ؟! الدبرياج ده يعتبر هو وسيلة وصل المكنه بالفتيس وفصلها عن الفتيس في نفس الوقت بحيث إنك تقدر تغير السرعات بسلاسة وأنت ماشي بالعربية ومن غير ما يحصل أي ضرر للمكنه أو الجير بوكس (علبة السرعات)
طب طقم الدبرياج ده بيتكون من إيه ؟!
-الديسك
-الإسطوانة
-البليه
-الحدافه
-رولمان بلي
-واير الدبرياج
هناخد بقي أشهر 3 حاجات في الطقم ده بيتعرضوا للتلف وبيأثروا علي العربية :-
أول حاجة الديسك وأعراض تلفه بتكون في صورة إن الدبرياج بينشف وبتلاقي صوت تزييق من الدبرياج وأنت بتدوس عليه.
تاني حاجة الأسطوانة ودي أكتر حاجه بتتعرض للتلف في الطقم كله وأعراض تلفها بيكون في شكل ضعف في سحب العربية بشكل عام وعلى المطالع والتحميل بشكل خاص ده غير إنك بتشم ريحه شبه ريحة الشياط أو كأن الكوتش بيتحرق وخصوصاّ لما تبدأ تتحرك بالعربيه أو علي المطالع.
أخر حاجة بقي البلية ودي بتسمعلها صوت شوشرة وتحس بيها في الفتيس وهتلاقي لما تدوس دبرياج الصوت بيروح.
حاجات بقي تخلي بالك منها :-
-لو سمعت صوت خرفشه وأنت واقف بالعربيه يبقي ممكن تحدد سبب الخرفشه دي منين وهي بتبقي من حاجتين :-
يا إما رمان بلي فصل الفتيس يا إما رمان بلي الدليل
طيب تمام عشان بقي تحدد الصوت ده طالع منين هتعمل 3 حاجات :-
أول حاجه وأنت واقف سلانسيه بالعربية لو لقيت صوت الخرفشه ده خارج من الفتيس يبقي كده السبب بيبقي من رمان البلي الأمامي اللي في الجير بوكس.
تاني حاجه لو مش الفتيس مصدر الصوت ده حط رجلك علي الدبرياج لو لسه وأنت بتضغطه سمعت صوت الخرفشه دي يبقي السبب من رمان بلي فصل الفتيس.
تالت حاجه لو مفيش صوت في أول دوسة الدبرياج كمل الدوسة بتاعتك للأخر لو سمعت الصوت ده والدبرياج تحت خالص يبقي السبب من رمان بلي الدليل.
-وأنت بتدوس علي الدبرياج لو لقيته طري أوي معاك يبقي ده معناه إن سوست الديسك ضعيفه وهتحتاج رجلاش للواير كل فترة وهتحس بيها لما تحس بصعوبة وأنت بتعشق السرعات.
-وأنت بتدوس دبرياج لو لقيته ناشف أوي معاك يبقي ده معناه إن سوست الديسك جامدة أو واير الدبرياج مشعر أو محتاج يتزيت.
-ياريت بقي الناس اللي علي طول رجليها علي الدبرياج عمال علي بطال ياريت تخلي بالك عشان أنت كده بتخلي الأسطوانه تتاكل من غير ما تحس وده هيخلي عزم العربيه يقل بالتدريج.
