الموبينة أساس الكهربا الموجودة في المكنة كلها ومش هنبقي بنبالغ لو قولنا أنه من الأجزاء الرخمة في المكنة واللي بتعمل مشكلة كبيرة لو حصلها حاجة ..
طيب إيه هي بقي الموبينة دي ودورها إيه في المكنة ؟!
الموبينة بالنسبة لدارسي مواد الفيزياء هي من نوع الملفات الرومكورفية وبتعتبر الموبينة من المكونات الكهربائية في أي عربية أما عن دورها فا هي بتستقبل كمية الفولتات البسيطة اللي بيخرجوا من البطارية وبتحولهم طلقائي لألاف من الفولتات واللي بدورها بيتم تحويلها أخيراّ ((للإسبراتير)) ومن الإسبراتير ((للبوجيهات)) والدورة دي بتحصل عشان يتحرق مخلوط البنزين و الهواء في المكنة و طبعاّ السؤال هنا طب ليه المكنة متشتغلش بكمية الفولتات بتوع البطارية وخلاص علي كدة ؟!
طبعاّ مينفعش تماماّ لأن كمية الفولتات اللي بتخرج من البطارية دي مش هتقوم المكنة لو عملت إيه وطبعاّ من هنا بقي أتضح الدور المهم للموبينة ودورها في المكنة ..
طيب أكيد زي أي حاجة في العربية ليها أعراض تلف طب إيه هي أعراض تلف الموبينة ؟!
من أشهر أعراض التلف بتبقي متمثلة في إن المكنة بتتأخر كتير في الدوران والعربية تقطع منك في المشي بشكل ملحوظ جداّ وعشان نكون واقعيين شوية الكهربا أنا شخصياّ بعتبرها من المشاكل الرخمة في المكنة لأن مشكلة الكهربا إنك مش بتبقي عارف السبب الرئيسي منين !! يعني مثلاّ بيبقي عندك ألف حاجة وحاجة ممكن يكونوا سبب العطل الكهربي منها البوجيهات والموبينة والإسبراتير والبطارية والدينمو يعني مواااال كبير ملوش أول من أخر.