إزاي احافظ علي مكنة عربيتى بشكل كويس وتعيش معايا لأطول فترة ممكنة" ؟!

+1 تصويت
سُئل فبراير 29، 2016 في تصنيف المحركات بواسطة عضو نشط (10,400 نقاط)

إجابة واحدة

0 تصويتات
تم الرد عليه فبراير 29، 2016 بواسطة عضو نشط (10,400 نقاط)

1- أول حاجة لازم تاخد بالك منها هو زيت المكنة كويس جداّ جداّ وفلتر الزيت والنقطة دي تعتبر أهم نقطة من وجهة نظري ونظر أي حد بيفهم لأن الزيت بالنسبة للمكنة زي الميا بالنسبة للبني اّدم لا دي تنفع تعيش من غير ده ولا ده ينفع يعيش من غير دي والزيت في المكنة لو نقص أو لزوجته قلت عن اللازم ده كدة بيشكل خطر علي المكنة وعلي كل القطع اللي بتتحرك جوه المكنة زي الكرنك والكامة والبساتم وغيرهم لأن الزيت في المكنة بيبقي أحسن مصدر تبريد ليها وده بسبب الإحتكاك الرهيب اللي أنت مش بتشوفه واللي بينتج عنه حرارة رهيبة وعلي فكرة الزيت الكويس يخلي صوت المكنة هادي وناعم ولو الزيت عندك وحش هتلاقي صوت المكنة عالي وبتكتك كدة ( تك تك تك تك تك ) ويبدأ الصوت يعلي معاك لحد ما هتتحرج تمشي بالعربية وسط الناس ده طبعاّ غير الزيادة الفظيعة اللي هتلاحظها في إستهلاك البنزين ..

2- تاني حاجة تاخد بالك منها كويس جداّ وهي المياة بتاعة المكنة يعني مثلاّ متبقاش المكنة بتتزود بمياة خضرا وأنت تزود مياة من الحنفية لأن مياة الحنفية هتخلي فيه شوائب في نظام التبريد ومع الوقت ممكن تمنع مرور المياة وبالتالي المكنة هتسخن !!

3- دايماّ تخلي بالك من حرارة المكنة يعني مثلاّ وأنت ماشي كل ربع ساعة كدة أخطف نظرة سريعة علي المؤشر عشان بس تطمن إن الحرارة مظبوطة وطبعاّ لو لاحظت إن المؤشر تجاوز النص لازم تقف بالعربية فوراّ وتشوف السبب من إيه عشان المكنة متجيبش وش سلندر.

4- دايماّ تهتم بإنك تسخن المكنة كل يوم لمدة نص دقيقة علي الأقل أو دقيقتين بالكتير قبل ما تمشي بالعربية.

5- أهتم كويس جداّ بالفلاتر بتاعة المكنة سواءّ مثلاّ فلتر هوا أو فلتر بنزين لأن دول يعتبروا من اهم الفلاتر اللي بتبقي في المكنة وأغسل المكنة كل فترة بس مش الغسيل الأي كلام اللي بنشوفه في المشاحم بتاعة العربيات بشويبة جاز وميا !! لأ حضرتك بتروح لمركز متخصص وخصوصاّ لو المكنة حديثة وهو هيعرف إزاي يغسل المكنة من غير أي ضرر وعلي فكرة موضوع غسيل المكنة ده مهم جداّ برضو وبيفوق المكنة جامد.

6- للناس اللي بتحرق علي الغيارات وبتحمل علي المكنة حمل زايد أوي أو بمعني أصح أكتر من طاقتها أنت كدة من غير ما تحس بالتدريج هتخلي المكنة تخف مع الوقت وهتبدأ تلاحظ إنها بتاكل زيت كتير.

7- طبعاّ الصيانة الدورية للمكنة بتاعتك والكشف عليها حتي لو مفيش فيها أعطال زي بالظبط اللي بيروح كل 3 شهور بعمل تحليل دم رغم إنه سليم بس عشان يطمن علي نفسه نفس الكلام كدة مع عربيتك أطمن عليها كل فترة مش لازم يعني تقف وتعطل بيك عشان تفتكرها.

8- دايماّ كل فترة أخطف نظرة سريعة علي لون العادم اللي بيخرج من الشكمان خصوصاّ الصبح بدري وأنت لسة نازل وشوف لون العادم اللي خارج إيه !! "أبيض _أسود" يعني عشان تطمن وطبعاّ إحنا كنا أتكلمنا قبل كدة علي موضوع ألوان العادم وكل لون بيدل علي إيه.


وفي الأخر أحب أقول حاجة لكل الناس "أنت كل ما هتهتم بعربيتك وهتحافظ عليها صدقني هتصونك وهتحافظ عليك وش هتقرفك معاها" واللي مجرب هيعرف معني كلامي ده كويس جداّ ..

اسئلة متعلقة

...