1- الكمبروسر
2- ريدياتير التكييف اللي هو الـ Condensar وعلمياّ أسمه المكثف
3- وسيلة التمدد أو البلف
4- التلاجة
5- غاز الفريون
وممكن دلوقتي نتكلم عن دور كل واحد منهم بس عشان من مطولش علي الناس كتير إحنا أنهاردة هنكتفي بذكر الحاجات اللي تعملها في التكييف في الصيف وفي الحر ده عشان الناس تكون علي نور وعشان برضو ناس كتير طلبت مني أتكلم عن التكييف وإيه اللي المفروض إنها تعمله في التكييف ..
- أولاّ سبب أساسي من أسباب إن التكييف يتعطل ويبوظ إنه للأسف بيفضل شغال 24 ساعة تقريباّ يومياّ في الصيف وده اللي بيخليه يتاكل أو بمعني أوضح أجزاء منه بتتاكل زي الكمبروسر وبرضو من أحد أسباب أعطال التكييف هي درجة الحرارة الشديدة جداّ وإن حضرتك مبتعملوش صيانة دورية فا طبعاّ بيبوظ.
- اللي يمكن ناس كتير متعرفوش إنك لازم تشغل التكيف بتاع عربيتك في الشتا كل فترة كدة وخصوصاّ قبل دخول الصيف يعني حاجة كدة زي كأنك بتسخنه مش من أوي يوم حر في الصيف تقوم مشغله الـ 24 ساعة وأنت موقفه ما لا يقل عن 4 شهور !! وعلي فكرة التكييف لما بيقف الفترة الطويلة دي ده بيأثر علي غاز الفريون بشكل سلبي وميخليش التكييف شتغل بكفاءة يعني من الأخر حضرتك دايماّ تكون مواظب إنك تشغل التكييف في الشتا نص ساعة بس في الأسبوع كله وتقفله تاني عشان ده يخلي غازات التبريد تشتغل بصورة كويسة لما تيجي تحتاجه في الصيف بقي زي دلوقتي.
- كمان لازم تفحص غاز الفريون اللي جوة التكييف بشكل دوري وطبعاّ مفيش إختلاف علي إنك لازم تستعمل غاز نوعه نضيف لأنهم بيختلفوا عن بعض وأفضل حاجة عن تجربة الياباني.
- في فصل الربيع تحديداّ وقبل دخول الصيف حضرتك تشغل العربية وتسيبها تسخن تماماّ وطبعاّ ميزيدش عن 4 دقايق بس وبعد الـ 4 دقايق دول تشغل التكييف بالتدريج يعني متعليش التكييف مرة واحدة.
- في الصيف بقي زي ما إحنا دلوقتي كدة مضووع إنك تسخن العربية الأول والكلام ده سيبك منه لأنك أصلاّ بتنزل تلاقي العربية مولعة ومؤشر الحرارة عاوز يخرج من الطابلوه فا أنت ممكن تنزل الصبح تسخن دقيقتين وتتكل علي الله وتفتح التكييف عادي جداّ.
- من أهم الحاجات اللي لازم الناس تكون عارفاها بقي إنك غلط جداّ إنك تشغل بعد الـ 40 كم/س لأن ده هيخلي الكمبروسر يحصله حاجة أسمها التصلب وبعدين مع الوقت هيقف تماماّ وهيبوظ يعني عاوز تشغل التكييف مفيش مشكلة بس تكون سرعة العربية أقل من 40 كم/س !!
- يفضل في نص اليوم لما تيجي تركن العربية لمدة طويلة تسيب شباك واحد بس أو أتنين مفتوحين شوية صغيرين عشان الصالون ميسخنش أوي ولما تيجي تركبها تاني يفضل إنك تفتح الشبابيك علي الاخر قبل ما تشغل التكييف أو حتي البيبان تفتحها 5 دقايق بس عشان السخونية اللي جوا العربية تخرج والعربية من الأخر كدة تشم نفسها وبعدين تشغل التكييف عادي جداّ.
- نصيحة مهمة جداّ في الصيف والحر ده حاولوا علي قد ما تقدروا تركنوا العربية بعيد عن الشمس أو في منطقة الشمس فيها ضعيفة أو محجوبة شوية لأ الظل هيساعد في إنه يحمي العربية من الشمس وبالتالي صالون العربية مش هيسخن أوي وده معناه إن الكمبروسر هيشتغل فترة قليلة أوي خصوصاّ أصلاّ إنك لما بتفتح التكييف الكمبروسر بيشتغل لحد ما يبرد الصالون تماماّ وبعدين بيقف والثرموستات بتكمل بقي الدور في إنها تبرد.
علي فكرة درجة الحرارة المثالية للتكييف اللي يشتغل فيها بأحسن قدرة وميأثرش علي العربية هي 22 درجة.