بسم الله الرحمن الرحيم. السفر من الامارات بالبر.
1. تاكد ان سيارتك صالحه للسفر ميكانيكيا والاطارات ممتازه وليست جيده فقط.
2. توجه للمرور التابعه سيارتك ليه واستصدر دفتر التربيتكت ب 550 درهم وشهاده التسفير السياحي ب 200 درهم.
3. دفتر التريبتكت بيكون عليه تامين نقدي حسب الصوره المرفقه لازم تدفعه ومسترد بعد العوده. حلك للتامين النقدي لو معاكش المبلغ كالاتي (خدلك قرض ب 35 الف او مبلغ التامين المطلوب منك. حطه تامين. حتدفع قسطين لحد مترجع من مصر وتسترد مبلغ التامين. سدد القرض. حتبقي تكلفتك مبلغ الفائده بتاع الشهرين والسداد المبكر وبس. انا شخصيا حعمل كده الصيف الجاي)
4. لو السياره مرهونه لازم تجيب لامانع من البنك قبل الخطوه السابقه.
5. توجه لجهاز الكمبيوتر بتاعك وخد موعد للحصول علي فيزه السعوديه من www.vfstasheel.com تكلفه الفيزا 235 درهم للشخص الواحد.
6. كل المسافرين عليهم التواجد في vfstasheel بغرض التصوير والتبصيم.
7. انت الان مستعد للسفر.
8. عبي سيارتك من باليل او اليوم السابق علشان تكون مرتاح اما تطلع علي الطريق. كل متكون مرتاح كل متمشي مسافه اكثر وغطي المقدمه وكل الاجزاء البارزه ب فيري شفاف او الرش ابو 10 درهم. انا بفضل الفيري العادي بدون اي اضافات ويكون شفاف
9. توجه للحدود وتأكد من ان معاك درهم الكتروني. رسوم المغادره من الامارات 33 درهم للجواز الواحد تدفع بالدرهم الالكتروني. وانته في الحدود حتلاقي صف طويل عريض سواقين شاحنات. ملكش دعوه بيهم. تقدم للمقدمه وقولهم سياره خاصه.
10. ادخل الحدود السعوديه بعد الحوازات والتفتيش حتشتري تامين مرور ب 70 الي 100 درهم حسب سيارتك. لو طلبو منك تنزل العفش متزعلش العيال الهنود حينزلوه ويطلعوه ويربطوه احسن من ماكنت انته عامل.
11. اول متخرج من الحدود حتلاقي محطه بنزين كييره عبي العربيه بنزين فل واشتري كرت موبايل اذا عاوز واحمد ربنا علي نعمه بنزين السعوديه.
12. حتحتاج بترول اجمالي في السعوديه مش اكتر من 500 او 600 ريال رايح جاي.
12. لا تاخذ طريق الخرج الرياض باليل. لو بالنهار توكل علي الله. لو باليل خد طريق الهفوف ومنه تطلع علي طريق الدمام الرياض في اتجاه الرياض
13. وصلت الرياض. لو رايح مكه اعتقد بتاخد مخرج 27 . لو مكمل علي ضبا او الاردن بتاخد طريق القصيم. طريق جميل ومفتوح.
14. المجمعه بريده حائل تيماء القليبه تبوك دي المدن الي حتعدي عليها. وممكن برضه تروح اما توصل بريده تكمل من طريق بريده المدينه المنوره ينبع املج الوجه ضبا وهو افضل للي متجه لضبا ومعندوش موانع انه يدخل المدينه المنوره.
15. وصلت تبوك. وصلت باليل ريح. وصلت بالنهار كمل بس لازم فايق الي بعد تبوك عاوز فوقان وعينك في راسك.
16. رايح الاردن حتاخد طريق حقل. رايح ضبا حتاخد طريق ضبا. الاتنين عاوزين انتباه شديد جدا.
17. وصلت حقل. اختم خروج وتوجه للحدود الاردنيه. حتحتاج حوالي 60 دينار رايح جاي. خلي معاك 100 دينار مبتخسرش. اما ترجع غيرهم درهم تاني.
18. وصلت الحدود الاردنيه. خلص إجراء الدخول والتامين والحجز من المنفذ. ولو عاوز تحجز من الميناء برضه صح.
19. ادخل المينا ووقف العربيه في الدور. حتلاقي مبني دورين جنبك. اختم التربتكت والخروج وريح في عربيتك لغايه ميقولو يالا بينا.
20. احسن موعد لدخول الاردن علي المغرب لان العباره بتطلع مع منتصف اليل.
21. وصلت ضبا. حتاخد لنش سريع. اول متدخل ضبا حتلاقي مبني علي ايدك اليمين بتاع شركه البلاغة حتحجز منه النش السريع. ملقتش سريع او عاوز البطيئه امش لقدام شويه حتلاقي دوار خده شمال وامشي شويه حلوين حتلاقي شركه نما مالك العبارات البطيئه احجز منهم.
22. ريح في النش ولو واخد عباره استحمي ونام وربنا معاك وراك كفاح في الجمارك المصريه. لو معكش حاجه تتجمرك حتدفع حوالي 1500 جنيه مصاريف وخلافه وبالتوفيق.
23. قبل متخرج من الميناء. لو سمحت لو سمحت لو سمحت. اتاكد ان كل ورقك معاك وورق السياره صح ورقم الرخصه والشاسي مطابق للواقع وان التربتكت مختوم.
24. عند وصولك مدينتك بالسلامه. الرجاء وضع سيارتك في جراج لانها لو اتسرقت حتتبهدل.
25. بعد متوصل بكام يوم روح احجز عوده من محافظتك ومتاجلش الموضوع لانك ممكن متلاقيش حجز لو معادك في الموسم.
25. قبل السفر باسبوع روح المرور الي طالعه منه رخصه القياده بتاعتك وجيب شهاده مخلفات سفاجا اجباري ونويبع بالحب بتمشي لو معاكش بس جيبها حتفيدك.
26. اهل الامارات. عاوزين تشتروا شبكه للسقف اطلع علي محلات زينه السيارات مقابل فندق حياه ريجنسي بدبي وعيش اشكال والوان. وكذلك للي عاوز السله الي بتركب وراء العربيه. الشبكه الحلوه ب 400 درهم والسله الجيده ب 450.
التكلفه : حسب السياره وعدد الافراد. فلنفترض سياره فورويل وشخص واحد التكلفه رايح جاي مش اكتر من 5500 درهم. انا بعمل حسابي في 6000 درهم للظروف ودي تكلفه التربتكت والاوراق والتامين والبنزين والعباره والجمارك المصريه رايح جاي. وده لا يشمل الفنادق لو حتنام في حته في السعوديه لانك ممكن تنام ب 100 وممكن تنام ب 1000. وبالنسبه لاي فرد فوق ال 12 سنه زياده احسبله 1000 درهم واي طفل تحت ال 12 سنه احسبله 800 درهم.
