ردا على اسئلة تكررت كتير ليه جبت التيجوان.. ليه مجبتش اتيكا.. ليه سبت الكادجار ؟

0 تصويتات

2 إجابة

0 تصويتات
تم الرد عليه سبتمبر 6 بواسطة مهندس مصطفى يسري (12,110 نقاط)
 
أفضل إجابة

يكتبه : مهندس سامح رمزي 

رحلة البحث عن التيجوان 
ردا على اسئلة تكررت كتير ليه جبت التيجوان.. ليه مجبتش اتيكا.. ليه سبت الكادجار 
مبدئيا انا واحد من الناس اللي بتحب العربيات عموما و كل و اي فرصه تجيلي اتفرج على عربيه او اجربها مبسيبهاش.. طبعا ليا شغلي و ظروف حياتي الخاصه و العائليه مش متخصص و لا متفرغ و لا خبير استراتيجي.. بس مهتم و متابع و بالذات في المحيط التصنيفي لعربيتي علشان ابقى عارف انا معايا ايه و موقعها ايه من المنافسين 
ناس كتير تعرف ان معايا رينو كادجار و الحق يقال هيا افضل قيمة مقابل سعر في فئتها بسبب الاعفاء الجمركي اللي بتتميز بيه... و طبيعي الواحد يكون طموح و بيسعى دايما للأفضل و الاحسن.. و دي حاجه مش سهلة مع الكادجار لأن لازم يندفع فرق فلوس محترم لأنها ببساطه في المجمل افضل بكتير من عربيات في رينج سعرها و حتى افضل من بعض العربيات الاغلا منها
في يوم دعاني صديقي العزيز مهندس Rami Gamal لتجربة السيات اتيكا.. الحقيقة العربيه عجبتني اوي اداءا و تجهيزات و مساحة صالون و شنطة رغم ان طولها الاجمالي 4363 مم اقصر من القشقاي 4394 مم... و اقصر من الكادجار 4445 مم و رغم كده شنطتها اكبر شويه من الكادجار و شويتين من القشقاي ... تصميم عملي مميز للمساحات الداخليه .. عربيه ممتازة و تستاهل فرق السعر لكن نفسيا مقدرتش اخد الخطوة مع ال dsg dry رغم ضمان الخمس سنوات 
طلعنا بعدها اتفرجنا على التيجوان و للحظ كانت الهاي لاين... الحقيقة عربيه مبهرة فعلا و فرق ال 12 سم طول عن الاتيكا ( 4486 مم) ترجمتهم فرق في وسع الصالون و حجم الشنطة 105 لتر ( 615 لتر حجم شنطة التيجوان ) ده غير فرق الخامات و التقفيل..خامات الاتيكا كويسة جدا... لكن التيجوان افضل... و تحسسك انها اغلا و افخم... بس في حين ان الاتيكا اكسلنس ب 610 الف التيجوان هاي لاين ب 760 الف.... بصراحة استغليتها او بمعنى اصح لقيتها داخلة في شريحة سعريه شرسة جدا مع gla x1 q3 CRV kuga و كلهم يعتبروا بريميوم براند باستثناء ال crv و kuga.. و لأن كده كده السعر كان اوفر بادجت بالنسبالي مقارنتش الهاي لاين بغيرها و سألت عن ال basic و سعرها 610 نفس سعر الاتيكا و مناسب جدا للبادجت.. مكنتش موجوده وقتها فاللي عرفته عنها الفروق بينها و بين الهاي لاين... او بمعنى اصح البيزك تقل ايه عن الهاي لاين... البانوراما و الفرش و الجلد و الكراسي الجلد كهربا بسخانات و العدادات الديجيتال و التكييف الديجيتال و الشنطة الكهربا... تجاوزت كل ده قلت رفاهيه مش حتفرق معايا اوي مقابل فرق الفلوس لحد ما سمعت كلمة الفوانيس هالوجين و ساعتها قلت باااااااس... دي كده فاضيه ملط.. و صراحة شيلتها من دماغي خصوصا ان فرق 150 الف كبير اداني احساس انهم عربيتين مختلفتين مش مجرد اختلاف فئات
بعد فترة العزيز رامي جمال قالي ان البيزك 2018 نازله srart/stop - kelyless entry - auto folding mirrors
و موجوده في الطارق.. فقلت اروح اشوف ايه العربيه اللي نازله بالكلام ده مع فوانيس هالوجين دي 
بالصدفه كانت واقفه ال basic 2018 جنب ال basic plus 2017 
اصلا شكل جنط ال basic plus خلا عيني زاغت عليها الاول.. العربيتين من بره تيبيكال . لكن الجنط تحفة و كمان لقيت الفوانيس ليد و فتحنا العربيه فيها بانوراما.. فقلت وجدتها هيا دي.. و ابص الاقي فيها كونتاكت.. هيا بتدور بمفتاح مفيهاش start/stop ؟؟... قمت نازل مركز مع ال basic 2018... لقيت الشاشه احدث و فيها app connect و طبعا المرايات الضم و البصمة و فرق سنة الموديل j مش h... و اقل في السعر... فقلت نفصصها كده نشوف فيها ايه.. بصراحة انطباعي اتغير تماما عن اللي كونته عنها لما شفت الهاي لاين... مالتي فانكشن كامله كروز كنترول سبيد ليميتر.. ميديا.. Voice command غير مفعل مش عارف ليه!!.. بلوتوث usb aux cd sd...مرايات تعتيم.. سنسورز امامي و خلفي.. حساسات ضوء و مطر و ضغط كاوتش و طبعا السيفتي اساسي ثابته مفيش فيها اي كلام 
الشاشه 8 انش تاتش سلس جدا interface محترم smooth مفيش lag او delay شغال من اول لمسه (محمد منير ) و تحكم في وظائف كتيره من الشاشه زي الاوتو لوك المساحات مع الريفرس خفض و رفع اضاءة الفوانيس.. شدة اضاءة ال footwell... تنبيه السرعة... الخ الخ 
الازاز كله كهربا وان تاتش بتحكم من الريموت و الزراير كلها بتنور... ( و دي عقدة نفسيه عندي لا يعلمها الا المقربون ) رغم انها من الحاجات الستاندرد في vag اللي مهما كانت فئة العربيه لازم يديك وظائف و تجهيزات اساسيه منطقيه تناسب احتياجات و متطلبات الاستخدام اليومي و بعد كده الكماليات و الاضافات
لحظتها اقتنعت بالتيجوان تماما و سألت عن الالوان فعرفت الالوان المتاحه في المعرض.. و مشيت على نية اعمل تست درايف لتجربة الاداء و الثبات و العزل بعد اقتناعي التام بالمواصفات و التجهيزات و التقفيل و الخامات و برضو استعنت بصديقي العزيز مهندس Mostafa Mohamed علشان اخد رأيه في البيزك 2018 و لا البلس 2017 و لانه زميل كادجاري يهمني كمان رأيه هل التيجوان تستاهل فرق السعر عن الكادجار خصوصا ان في كماليات في الكادجار مش موجوده في التيجوان بيزك زي الكاميرا و الفرش الجلد و البانوراما و الفوانيس الليد ... اتفقنا نتقابل هناك تاني يوم و روحت البيت دخلت على الشبكة العنكبوتية حاولت اعرف ايه الالوان اللي بتنزل مصر معرفتش.. تاني يوم قابلت مصطفى و اتفرج معايا على الفئتين و كان رأيه من رأيي .. و فاكر كويس كلمته لما سألته انت لو مكاني حتحس بفرق ملحوظ للأفضل عن الكادجار و تدفع فرق السعر .. قالي " نقلة حضاريه في المولتو " 

و بعدها قلت اسأل تاني عن الالوان اللي بتنزل لحد ما اعمل التست درايف و الرد المرادي من السيلز كان داخل لنا الوان كذا و كذا و "ازرق" و في هذه اللحظة تحولت لطفل صغير وضعوا امامه لوح الشيكولاته و نسيت التست درايف و الدنيا و الثبات و الاداء و الباقي معروف... بس خلاص
طبعا انا كنت مجرب التيجوان 2016 و متوقع ان الاداء و الثبات و العزل حيكون مساوي ان مكنش افضل... خاصة و انها تتفوق عن الاتيكا في العفشة و التقفيل و الخامات و بالتالي عن الكادجار... و ارقام الاداء معروفه و زمن التسارع الرسمي للتيجوان 9.2 ث الاتيكا 8.6 و الكادجار 10.7 و كنت مبسوط بيه و بالتالي رقم تسارع االتيجوان اكتر من كافي بالنسبالي... وتوقعت ان الاداء حيكون في منطقة الرضا... و قد كان.. و افضل من توقعي

0 تصويتات
تم الرد عليه سبتمبر 6 بواسطة مهندس مصطفى يسري (12,110 نقاط)

تكملة2 .....

في حاليا موديلات جديده منافسه نزلت في نفس رينج سعر التيجوان زي ال 3008 و الجراند لاند...
طبعا لا غبار عليهم لكن بالنسبالي بحس ان الفرنساوي بيخاطب عاطفتك الاول بيشدك للعربيه انك تحبها بشكلها و ادائها و شوية الدلع و بالتالي تتغاضى عن بعض التفاصيل و الملاحظات.. كأنك متجوز واحدة حلوة اوي و بنت ناس وقمه في الادب و الاخلاق بس ملهاش في المطبخ... لكن الالماني او vag خصوصا بيخاطب عقلك الاول و ممكن يديك عربيه صندوقية الشكل خطوط واضحة صريحة لدرجة الملل غالبا .. هدفه من الشكل الوظيفة و المضمون اولا .. تصميم يحقق اقصى درجات العملانيه فتحبها لانها فاهماك و بتريحك و بتوفر لك احتياجاتك و متطلباتك... و مع احترامي لاوبل و ملاكها.. الجراند لاند عربيه مواصفاتها و تجهيزاتها و ارقام الاداء ممتازة و مبشرة لكنها من وجهة نظري الشخصيه البحتة نتاج تزاوج ذكر gm مع انثى بيجو اللي سافرت المانيا تولد هناك علشان تاخد الجنسيه ... منين يا بلدينا ؟؟!!
اكينوكس شوفتها عربيه كويسه جدا ... مساحات و حجم واداء و تجهيزات ...و سعر تنافسي جه على حساب الخامات الداخليه .... دماغ تانيه غير دماغي .. عجبتني لكن لغيري مش ليا ..
ميتسوبيشي اكليبس .. اتفرجت عليها و جميله و عجبتني جدا لكن مفيش شنطة مون بي و شرحه للسوبارو xv .. بالاضافة الي بطء الاداء النسبي للسوبارو ... الامور محسومة... end of text
توسان و سبورتيج تيربو .. عربيات جميله و محترمة و تجهيزات كويسه وعوامل امان متوفرة و مواتير و فتايس حاميه ربنا يبارك لاصحابها ... 
طبعا الكوجا لا يمكن اغفالها و اي حد بيفكر في عربيه AWD في رينج السعر و الفئة لازم ارشح له الكوجا ... لكن بالنسبالي مش محتاج الدفع الكلي و عملانيه المساحات و حجم الشنطة و الاداء الفعلي عندي اهم من ارقام كبيره مش حستفيد بيها كأحصنه زيادة ( تسارع الكوجا 10.1 ثانيه .. تسارع الكادجار 10.7 ثانيه .. الكوجا 182 حصان و الكادجار 130 حصان ...50 حصان في 0.7 ثانيه !! ... شنطة الكادجار اكبر ... ادفع زيادة ليه اذا كنت مش محتاج الدفع الكلي و رغم تحفظي على اسعار صيانة الكادجار و مغالاة توكيل رينو في المصنعيات ... الا ان تكلفة الصيانات عمرها ما حتجيب فرق السعر و لللأسف لا قوة التوكيل و لا حتى تكلفة الصيانه الاقل فرقت في سعر الريسيل !!!... بالاضافة الي ان معدلات استهلاك البنزين في الكوجا اعلا

غير ان توليفة الموتور التيربو الصغير مع الفتيس الديوال كلاتش اكلت دماغي من ساعة الكادجار مش قادر اخرج منها بسهولة
و طبعا لما يكون موتور vw 1.4 الشهير مع فتيس dsg wet... التركيبه دي عندي مع عربيه الماني اسما و فعلا حسمت نقاط كتير ابسطها توازن الاداء اللي بيحقق متعة و ازمنة تسارع افضل من مواتير اقوى و اكبر في نفس الوقت مع اقتصاديات تشغيل و معدل استهلاك ممتاز 

اخيرا النصيحة لاي حد متكونش رأي عن عربيه الا لما تكون شوفتها بنفسك... و معايير التقييم بتختلف من حد للتاني.. خد النصيحة من حد تكون دماغه زيك او علي الاقل عارف دماغك و يقدر و يتفهم متطلباتك و معاييرك مش يركبك العربيه اللي هو نفسه يركبها او اصلا معاه ... اسمع لكل الناس لكن قرارك من دماغك
الاختيار الشخصي و المعايير الخاصه مش معناها ابدا ان الشخص اختار احسن عربيه .. لكن اختار انسب عربيه ليه و لاحتياجاته و طبيعة استخدامه ... و بالتالي رأيي السابق هو انعكاس شخصي و ممكن تكون اي عربيه اتذكرت او لم يتم ذكرها احسن في المجمل .... و افضل لغيري ..

اسئلة متعلقة

0 تصويتات
1 إجابة
...