تجربتي مع البيجو 3008

0 تصويتات

2 إجابة

0 تصويتات
تم الرد عليه سبتمبر 6 بواسطة مهندس مصطفى يسري (12,110 نقاط)
 
أفضل إجابة

يكتبه : أشرف عطاالله 

علشان في ناس كتير بتسأل علي البيجو ٣٠٠٨ وبمناسبة مرور ٣ سنوات و ٧٥ الف كيلو علي اقتنائي العربيه فأنا هحاول أوجز التجربه لغايه دلوقت:
مبدأيا عربيتي الشكل القديم الفئه الثانية وهيا كانت فئتين وآخر موديل ليها ٢٠١٧
مواصفات الموتور ١٦٠٠ تيربو ١٦٣ حصان والعزم ٢٤٠ نيوتن ميتر وهوا نفس الموتور والفتيس بتاع الشكل الجديد ٢٠١٨
١- الموتور قوي ومريح في كل المراحل يعني في الطلعه والسرعة البطيئة والسرعات العاليه يعني بتوصل لل ٢٠٠ من غير ما تحس ان العربيه بتعاني او زعلانه بالمناسبه انا جبت ال ٢٠٠ دي مرتين بس علشان الطرق مش أمان 
٢- الفتيس اوتوماتيك ست سرعات استجابته ممتازة بردو في كل الأحوال وهوا مع التيربو بيدي اداء هايل الأرقام من ٠ الي ٩٠ في ٩ ثواني دي حقيقه في احساس بالتربو لاج turbo lags ممكن التغلب عليه بوضع الفتيس علي sports mode مع الأخذ في الاعتبار زياده استهلاك البنزين و نقل الحركه علي rpm عالي فدا بالنسبالي قرص علي العربيه مالوش داعي بس في ناس غاويه كدا
المميزات اداء الموتور مع الفتيس قوي جدا جدا ومفيش منافسه بصراحه مع اي ياباني او كوري او صيني طبعا ال ١٦٠٠ وأقل ومافيهوش تيربو في الطلعه والسرعة البيجو تكسب وبالنسبه للأوروبي في السرعه بردو تكسب اي cc اقل من ١٦٠٠ يمكن باستثناء السيات اتيكا
المشاكل الموتور حساس جدا للبنزين يعني لازم مايكونش مغشوش ٩٢ او ٩٥ مش مهم المهم مايكونش مغشوش بالجاز او السولار او الميه انا الحمدلله ماحصلش معايا حاجه لغايه دلوقتي علشان محدد بنزينه واحده مابغيرهاش وفِي السفر بسأل كتير قبل مابمون النقطه دي من خبره الملاك وماحصلتش معايا لحد دلوقتي الحمدلله
الزيت اللي بيتغير في التوكيل موبيل ١ الأخضر ودا انا بغيروا كل ١٠ آلاف بدون مشاكل الحمدلله في ناس كتير غيرت الزيت للزيت بتاع BMW بس انا مقتنع ان مادام التوكيل محدد نوع أكيد مش هيضر عربيته
موجود في الكتالوج ان الزيت ممكن يتبخر بنسبه معينه انا لغايه دلوقت ماعملتش حاجه بين كل تغييره زيت يعني مستوي الزيت بين min وال max 
في ناس من الملاك لاحظو ان الزيت بينقص ودا انا مالحظتوش وصوت الموتور يعتبر عالي في ناس بتحب كدا وفِي ناس مابتحبش
طبعا بالنسبه للياباني والكوري مافيش حاجه اسمها الزيت ينقص حتي لو مشيت ٢٠ الف 
الميه والتبريد مافيش مشاكل خالص المؤشر علي ٩٠ بعد خمس دقائق من البدايه ولغايه ماتركن مروحه التبريد بتشتغل معظم الوقت وغالبا بعد التوقف وطبعا بالنسبه للياباني والكوري مابتحسش أصلا ان في مروحه
دوره التبريد مهمه جدا للعربيه دي علشان تبريد كولر الفتيس وتبريد التيربو فمافيش هزار في اي حاجه مش طبيعية تحصل زي نقص المياه او تشغيل المروحة السريعه بدون داعي او اي ايرور يحصل وبردو ماحصلش معايا حاجه من دي الحمدلله 
٣- الاتزان والامان والعفشه
العربيه ممتازة في النقطه دي علشان هيا فعلا متزنه جدا وماسكه نفسها علي كل السرعات والملفات وطبعا الفرامل قويه جدا وفيها كل انواع الأمان للفرامل و العربيه فيها ٦ air bags ووزن العربيه حوالي ١٦٠٠ كيلوجرام ومش عاليه اوي عن الارض فهيا ثابته فعلا وكمان في نظام للمساعدين الخلفي حاجه كدا اختراع والكاوتش ميشلان ألماني يعني في خامات عاليه في العربيه مش اي كلام كمان الباور تقيل شويه ودا بيدي احساس بالثبات بردو
٤- الكابينه والاوبشن
الكرسي مريح جدا ووضعيه القياده جميله وفِي ديزاين حلو للسائق تحس إنّو معزول عن بقيه العربيه والشنطه واسعه جدا الكنبه الخلفيه معقوله وتكفي ٣ علشان مافيش نفق فتيس بس مساحه الرجلين مش واسعه اوي خصوصا للناس الطوال
العيوب ان مافيش شاشه وكاميرا خلفيه وبلوتوث ودي حاجه مش لطيفه وبعض الملاك ركبو الحجات دي بتكلفة حوالي ٨٠٠٠ جنيه 
في مرايات ضم وروافع للزجاج ومرايه تعتيم وزجاج بانوراما السقف كلو وحساسات مطر
وفي مثبت ومحدد سرعه ودا ركبتو في التوكيل في اول زياره كان ب ٧٠٠ جنيه وبيركب في ١٠ دقائق وفي حساسات ركن ورا واللي قدام بردو بتركب في التوكيل 
طبعا في عربيّات صيني فيها الاوبشن دي كأنها اساسيات ود حاجه كويسه بس مش المفروض تبقي اولويه
٥- التكييف 
بالنسبه لي التكييف كويس يعني بياخد وقت شويه علشان يحقق بس هوا كافي جدا خصوصا ان له مخارج الكنبه الخلفيه وضبط مستقل للكرسين الأمامين
بردو الكوري واليباني بيتفوق في الحته دي علشان هوا بيحقق بسرعه وتبريده أقوي 
٦- الصيانات
 

0 تصويتات
تم الرد عليه سبتمبر 6 بواسطة مهندس مصطفى يسري (12,110 نقاط)

6- الصيانات

التوكيل كان مع CDCM وبعدين بقي مع منصور من ٢٠١٨ انا عملت الصيانات مع التوكيل القديم الأسعار بالنسبه للكوري والياباني أرخص دي الحقيقه وبعد فتره الضمان في مراكز كتيره كويسه بتشتغل في البيجو عندها الأصلي وبعض البدائل يعني مثلا تيل الفرامل الأمامي الأصلي ب ١٢٠٠ جنيه والبديل اوربي بردو ب ٦٠٠ جنيه + حاجات العربيه موجوده استيراد علشان هيا من ٢٠١١ ودي ميزه علشان لو عايز اي اكسسوار ممكن تلاقي بدائل في الاستيراد بأسعار معقوله
لِسَّه مافيش اخبار عن التوكيل الجديد والاسعار فيه بس انا مرتاح مع مركز مش معتمد وهكمل معاه إنشاءالله 
٧- سعر أعاده البيع 
بصراحه دي عايزه تغيير ثقافة علشان العربيه اداء عالي جدا وامان وتلاقي الناس مش عايزه تشتري وتدفع في عربيّات اقل بكتير فلوس اكتر وهيا مبسوطة وراضيه حتي بعد ماالصيني عدي ٤٠٠ الف بردو لِسَّه عايزين ينزلوا سعر بيجو المستعمل علشان كدا انصح كل الملاك بعدم قبول اي سعر غير عادل كفايه ان البيكانتو ب ٢٤٠ الف
٨- المشاكل الشائعة 
في بعض المشاكل اللي حصلت مع بعض الملاك زي طلمبه بنزين الضغط العالي ودي قطعه ليها عمر وبتتغير ممكن تعمل حسابك عليها بعد ال ٨٠ الف وفِي ناس حصلتلها قبل والتكلفة حوالي ٨ آلاف 
التيربو ودا بردو حاجه ليها عمر وممكن لو عملنا بعض الاحترازات ماتجيش غير علي كيلومتر عالي او ماتجيش خالص زي التسخين دقيقتين الصبح وعدم القرص والعربيه بارده وترك العربيه دايره شويه بعد اي مشوار طويل يعني التيربو عايز heating up و cooling down والتكلفة الأصلي ٢٥ الف والصيني حوالي ١٥ الف
٩-الخلاصه
ال بيجو ٣٠٠٨ عربيه ممتعه جدا في القياده والاداء حاجه كدا سكه البي ام وعلي الطريق وحش محدش كتير يقدر يطلع منها علشان هيا ممكن يكون شكلها مش سريعة وبعدين بتتفاجأ انها وحش والاسد ابتدئ يزمجر بس هيا عربيه حساسه ومش اي حد بيفهم فيها يعني لازم بتاع بيجو وهوما مش قليلين ومش كتير وممكن تعمل حسابك علي بعض الصيانات اللي مش معتاده زي موضوع طلمبه الضغط العالي دا فاميزعلكش لو حصل لان في عربيّات صيانتها اكتر كتير من البيجو والنَّاس بتدفع ومبسوطة 
لو عايز متعه وقوه وأداء وبردو حرص ودقه ومتابعه يبقي ٣٠٠٨ 
ولو عايز عربيّات عاديه و اعتمادية ومش عايزه عنايه كتير وسعر أعاده بيع كويس يبقي ياباني وكوري

اسئلة متعلقة

...