1- Shift Lock :
عشان تعرف إستخدامه تعالي أقولك علي حاجة سريعة كدة طبعاّ في العربيات المانيوال بتنزل فرامل اليد وتمور الفتيس عشان العربية تتزق بسهولة وقت اللزوم، طيب في الأتوماتيك بقي إيه الحل ! هتجيب الفتيس علي الـ N طيب دلوقتي في عربية زي الكورولا لا يمكن إنك تشيل المفتاح أصلاّ من الكونتاكت إلا والفتيس علي وضع الـ P اللي هو (التعشيق) ! طب هنا بقي إيه الحل عشان تجيب الفتيس علي N بعد ما تشيل المفتاح و تبطل العربية ! هي دي بقي فايدة الزرار ده إنك بكل بساطة بتضغط عليه يقوم الفتيس يتحرر من القفل بتاعه من وضع الـ P و تجيبه علي N بكل سهولة وتقوم تشيل المفتاح وتبقي كأنك بظبط مورت الفتيس بتاعك في المانيوال.
2- Hold :
إستخدام الزرار ده في الطرق اللي بتبقي مزحلقة جداّ يعني زي التلج أو الزيت وفكرة عمله إنه بيخلي العربية تاخد الغيار التاني بشكل بطئ جداّ عشان الكاوتشات متلفش مع نفسها والكلام ده لو كانت الجير علي الـ D في الحالة دي بيتلغي الغيار الأول تماماّ والجير بيعشق من الغيار التاني والتالت والرابع أما لو أنت حولت لأي وضع تاني غير الـ D هتلاقي الغيار بقي ثابت علي الرقم الموجود سواءّ 1 أو 2 أو 3
3- O/D :
دي طبعاّ خاصية الـ Over Drive
ده فايدته إنه بيزود سرعة الدوران اللي بتدخل للجير بوكس فا بالتالي سرعة الدوران دي لما تخرج من الجير بوكس فا تتحرك العربية بأقل جهد .. يعني سرعة دوران المكنة اللي بتتنقل للجير بوكس عن طريق الـ Fly Wheel هتزيد لما تخرج من الجير بوكس وبالتالي هنلاقي العجل بيتحرك بسرعة أكبر وبالتالي العربية.
4- W :
الزرار ده بيبقي موجود في بعض العربيات زي مرسيدس وترمز لكلمة Winter والزرار ده بيعمل نفس اللي بيعمله زرار الـ Hold
5- C :
في بعض العربيات هتلاقي الزرار ده ومعناه Comfort وده بيخلي الجير ينقل غيارات هادية جداّ.
6- E :
هتلاقي الزرار ده في بعض العربيات ويرمز لكلمة Economy وبيعمل نفس اللي بيعمله زرار الـ C ولكن هو يستحق الأفضلية لأنه بيوفر في إستهلاك البنزين.
7- M :
ده بيحول الجير من وضعية الأوتو لوضعية المانيوال وبيبقي في العربيات الإستبترونك.
8- L :
ده فايدته بكل بساطة إنه بيثبت الغيار علي الأول وأنت طالع علي مطلع عالي.
9- الأرقام اللي بتبقي موجودة على الجير (1- 2 - 3- 4- D4 - D3) لما بتحط العصاية علي أي وضع من الأوضاع يبقي ده يدل على إن النسبة الأعلى هتكون على نفس الرقم يعني مثلاّ لما بتحط العصاية علي 2 يبقي الغيارات هتتنقل ما بين 1 و2 بس.
10- Ds :
يعتبر نفس مبدأ عمل الـ O/D تقريباّ بحيث إنه بيحول الجير للمانيوال ومبينقلش الغيارات إلا في حالة وصول الـ RPM للـ Red Zone ودي بتفيد العربية لما بتيجي تطلع علي مطالع.