لكل شىء أساس و أساس يعنى قاعدة ونفس الكلام ده بينطبق علي مكنة أي عربية في الدنيا.
المكنة بيبقي ليها قواعد مخصصة عشان المكنة تقعد عليها ( تريح عليها ) وده طبعاّ عشان هدف فني مش كدة وخلاص.
طب إيه هو الهدف ده ؟! طبعاّ نظراّ إن بتتولد ذبذبات كبيرة جداّ جداّ على المكنة نفسها لما بتمر بفترة شوط الحريق كان لازم علي مهندسين السيارات أنهم يصنعوا شئ عشان يقلل من الذبذبات دي وكمان أنهم بقدر الأمكان يحاولوا يمنعوا الذبذبات دي عن شاسيه العربية وعشان كمان يقلل من إحساسك أنت كعميل له بقدر الإمكان من الذبذبات دي.
وإذاّ من هنا نفهم إن قواعد المكنة أتصممت أساساّ عشان راحة العميل ( قائد السيارة ).
طب إيه هى بقي قواعد المكنة ؟! فى الأساس أصلاّ قواعد المكنة عبارة عن شكل هندسى معين مصنوع من المطاط ( نوع من أنواع الكاوتش ) وبتتحط القاعدة دي بين المكنة وشاسيه العربية و أتصنعت من المطاط عشان المطاط له قدرة عالية على أمتصاص الذبذبات دي وإنه كمان له القدرة علي أمتصاص ذبذبات بين عنصر متعرض للذبذبات زي المكنة وعنصر تاني ثابت زي الشاسيه وبالتالى طبعاّ حضرتك هتلاقي نفسك قاعد جوة العربية مش حاسس إن فيه مكنة أصلاّ بتتحرك.
وهنلاحظ إن بعض مهندسين السيارات حاولوا يصنعوا قواعد للمكنة بنفس نظرية المساعدين الزيت عشان تمتص الذبذبات الناتجة من عملية شوط الحريق دي والفكرة دي كانت كويسة جداّ بس للأسف كانت نادرة جداّ من حيث التنفيذ.
هنلاحظ فى عربيات الدفع الخلفى إن بنسبة 90% بيكون فيه للمكنة قاعدتين وبتكون واحدة تحت كل جنب من جوانب المكنة ( بالطول ) لكن فى عربيات الدفع الأمامى بيبقي فيه أكتر من قاعدتين عشان يساعدوا فى تأمين العزم اللي بيتنقل من المكنة بالفتيس لمحاور دفع العربية الأمامية وبنسبة 90% بتتركب قاعدة واحدة في كل جنب للمكنة ( بالعرض ) يعنى كدة قاعدتين وبيبقي فيه واحدة فى نص المكنة الأمامى بعد الإكصدام.
لما قواعد المكنة بتتكسر قول علي نفسك يا رحمن يا رحيم لأنك هتحس بحاجات أول مرة تحس بيها في عربيتك زي مثلاّ هتلاقي صدمة عنيفة جداّ لما تيجي تعشق ولما تيجي تفصل المكنة ولما تيجي تمور العربية ومن الحاجات اللي هتحسها برضو رجرجة عنيفة جداّ في المكنة بسبب إختلال مرونة القاعدة على الرغم من إنك لو جيت بصتلها كدة بشكل خارجي هتلاقيها سليمة.