الإسبراتير تعتبر أم الكهربا في العربية وتعتبر من الأجزاء الرئيسية في مكنة العربية عشان نكمل منظومة الكهربا في العربية بقي هنتكلم عن الإسبراتير واللي بيتسمي بموزع الكهرباء وهنعرف دلوقتي إزاي وليه الأسبراتير بيعتبر الجزء المسئول عن توصيل الكهربا للبوجيهات فى توقيت معين حسب ترتيب الأسطوانات في المكنة وبيبقي فيه نوعين من أنواع الإسبراتيرات :- 1- الإسبراتير العادي2- الإسبراتير الإلكترونى "الأتنين وظيفتهم واحدة علي فكرة ولكن بيختلفوا عن بعض بس في طريقة التنفيذ أو التنظيم وهنفهم إزاي دلوقتي". 1- الإسبراتير العادى :- وده وظيفته توزيع الكهربا على البوجيهات بترتيب معين وبيختلف عن الإسبراتير الإلكترونى في إنه بيعمل مهمته دي عن طريق حركة ميكانيكية يعني زي ما بنقول كدة أسطمبة واحدة حافظها وماشي عليها يعني مفيش فيها دقة أوي بس شغال عادي طبعاّ. 2- الإسبراتير الإلكترونى :- بيعمل نفس الوظيفة اللي بيعملها أخوه العادي بس بيفرق في إن مهمته بتبقي من غير حركة ميكانيكية إنما بتبقي عن طريق حركة إلكترونىة بتوقيتات دقيقة جداّ وهنا الفرق بقي بين الأتنين وده موجود في العربيات الحديثة دلوقتي وطبعاّ نتيجة للتقدم ده بيبقي فيه فرق كبير جداّ فى الإستجابة و التجميع و السحب عن الإسبرايتر العادي.
أما عن تكوين الإسبراتير من جوه هو بيبقي جواه حاجتين مهمين جداّ و هما أساس تشغيله أصلاّ حاجة أسمها (الأبلاتين) وحاجة أسمها (الكوندنسر) وعشان الناس اللي بتخلط بين أنواع الكهربا في العربية الإسبراتير بيظبط كهربة المكنة نفسها مش الكهربا اللي بتنور الفوانيس والطابلوه لأن دي حاجة ودي حاجة تانية خالص !!
أعراض تلف الإسبراتير بقي لما بيبقي مش مظبوط حضرتك بتيجي تدور المكنة مش هتدور معاك ولا هتنطق أصلاّ من الأول ولو لسة فيه الروح هتلاقي العربية وأنت ماشي بيها بتنتش جامد وخصوصاّ لما بتزود للعربية بتحس أن المكنة مش عاوزة تستجيب كأنها بتاخد البنزين بس مش بتشغله كله.
علي فكرة الكهربا في العربية من المشاكل الرخمة زي ما كنت قولت قبل كدة بس تحذير مهم جداّ إوعي حد يفكر إنه يلمس الإسبرايتر أو يحركه عن مكانه ولو حركة بسيطة أنا هقول السبب بس مش ناس كتير هتفهم ده بس هيتم شرح السبب في وقت تاني بإذن الله .. السبب إنك لو فكيت الإسبراتير وحركته من مكانه يمين أو شمال إنت كدة ممكن تخلف وش التقسيمة بتاعة المكنة كلها ليه بقي لأن الكهربا اللي رايحة للبوجيهات من الإسبراتير بيبقي ليها طاقة معينة من الفولتات حركتك دي ممكن أوي إنها تزود الفولتات دي فا بالتالي المكنة مش هتستحمل الطاقة الزيادة فا هتقوم تعمل حاجة إسمها "المكنة خلفت وش تقسيمة" وعشان كدة لما بتروح لميكانيكي ويفك الإسبراتير لو لاحظت هتلاقيه بيعلم مكان ما فك عشان لما يرجع يركب تاني يركبه بالطريقة الصح عشان ميخلفش وش التقسيمة.
الصورة الموضحة تحت دي لشكل الإسبراتير اللي لونه بالأحمر ده وهتلاحظوا حاجة إن خارج منه أربع أسلاك كهربية الأسلاك دي هي اللي رايحة بتوزع الكهربا علي البوجيهات.